Daniela & Steve.. on the road:)

red center & west coast

Tue, 13 Apr 2010 10:43:00 +0200

uiuiui.. wo fö mer a?.. mittlerwile si scho wider nün täg vergange sit üsem letschte brichtli.. wo simer stah blibe?.. in cairns gloubeni.. jaja, das isch cairns gsi.. mir hei dört e ganze schöni zit verbracht, trotz dem vile rägä.. am abe vo däm tag, wo mir dr letschti bricht hei ufgschalte si mir nomau mitem päärli vo frankrich go znacht ässä.. mir heis wider uu luschtig gha und üs fasch chrumm glachet.. de simer no a night market go t-shörtli choufe für ar géraldine ihri zwöi nichtechind und e stei für ume haus vom romain sim neuveu. guet.. de het o d daniela e wunderbare stei amne lederbändeli entdeckt, wo si gfesslet het.. es isch eine vo queensland und isch e opal.. so e wunderschöne stei.. de steve het dä de ade daniela grad pöschtelet.. de ma, wo di steine säuber suecht und natürli ou fingt;).. het de gseit, für si sigis so chli so, dass si sägä, dass jede stei, wo si finde für irgendöpper bestimmt isch.. und so isches bi mim gsi.. de het mi gfesslet u nümme losglah.. er isch so chli e heimlifeissä, hihi.. we du ihn einfach so aluegsch, de gsehsch eigentlich e normale stei.. wenn du ihn aber de genauer aluegsch, de gsehsch sini verborgnige wunderbare farbe.. de steve het de ono eine usgsuecht, ou er isch grad begeisteret gsi, es tigeroug.. da de stei aber de e riss gha het, het de steve sich ou fürne opal entschide, e matrix opal, ou er isch wunderschön und sini schätz si chli versteckt.. ja, mir si haut o zwöi lustigi.. mit dem ma heimer no schöni sätz ustuscht, er isch ata gsi vo üsere gschicht (da wo mir dr romain und dgéraldine troffe hei, si si are tankstell gstande une hei kei batterie meh gha.. mir hei keis kabel zum überbrügge gha.. mir hei üs de verabschidet und ufdr witerfahrt heimer dänkt, nei mir chöi di zwöi jetz nid eifach im stich la.. mir si de när zum nächste huus – was e ziemlichi kunst gsi isch, wüui mir ir pampa usse gsi si – dert het e frou ihrem sohn aglütte, keis gha.. witer zum nächstä huus.. dört simer uf spanier oder vilich ou südamerikaner troffe.. er het de eis gha und de simer zrügg gfahre und womer härä fahre, het ihne grad öpper ghulfe.. si si aber beidi u ageta gsi, vo üsere hilf und hei gseit, si wie üs ilade.. mir hei de e-mail ustuscht und si witer.. mal luege.. prompt am nächste tag träffe mir si wider ider lagoone vo cairns im wasser.. nachere stund plöiderlä im wasser simer de zämä go znacht ässä.. ja das isch di gschicht gsi, wo dä ma u gfröit het.. eh isch eifach schön gsi..

guet de simer witer zude schlange.. mir hei de schlange zum häbä und strichele becho.. dr steve het es riise ding becho und ig ha ganze schöni bsundrigi chlineri becho… er het si extra usegholt, wüu er haut o gmerkt het, dassi grosse respekt ha.. mir si när ziemli lang dört mit dene schlange gsi und er het när u fröid gha, dass er mir sone grossi fröid het chönnä machä.. – isch es herrlichs tier..

ja, de am nächste tag churz vorem mittag simer uf uluru gfloge.. dört simer chli go dGegend uskuntschafte.. isch sehr heiss gsi.. ha grad chli müeh gha am afang, aber de steve het de guet zu mir glueget..:). am nächste tag am nami simer ufene tour zu de Kata Tjutas (auch genannt Olgas) und de zu sunset no zum Uluru (auch genannt Ayers Rock).. isch u schön gsi.. am morge druf simer ufene sunrise camel tour.. uu süess di kamel auso genauer gseit dromedar.. übrigens heitdr gwüsst, dass ddromedar ursprünglich us de wüestine vo australien chöme??.. insgesamt simer öppe acht dromedar gsi und uf sibe de vo si je zwöi witeri ghöcklet.. auso simer insgesamt 22 kamel gsi.. hihihi.. nei isch würkli super gsi..:).. und de am nami simer witergfloge..

nach perth.. dert heimer de zouto gno (e corolla..hihi.. nomau es grüessli a mis mami).. und si losgfahre richtig süde.. ufem wäg e abstächer i mac und de hopp de bäsä.. was gisch was hesch uf mandurah.. de steve het da rächt viu ztüe gha, er het müesse lerne mit de linke hand zschalte, witerhin links fahre, denn de blinker uf de rächte sitte.. denn no luege wo düre.. d daniela us sini persönlichi co pilotin.. het ne de versuecht, so guet wi möglich zunterstütze mit navigiere.. er macht das super übrigens.. bi dere glägeheit mau es grosses merci a di mis schätzeli.. für au dini super und sichere fahrte.. meischtens isch nämli de steve gfahre, mhm.. guet zrügg zu mandurah.. es wunderschöns örtli grad direkt am meer.. mir hei dört es u schöns hotel (the sebel) gfunde, grad am wasser.. herrlich.. am nächste tag simer nachemne feine zmorge is info center.. super liebi lüt hie.. und hei üs la berate.. de heimer grad entschide no e nacht zblibe und si de ufene eistündigi bötlitour dür mandurah.. hie isch sehr viel am wasser u di meiste hei no böötli vorusse.. so cool.. würd üs ou no gfauä, hie zläbä.. mhm..:)..
am nächste tag simer witer uf bunburry und busselton, womer de übernachtet hei und gägä abe simer no dört as meer… wunderschön dört.. denn witer uf margret river.. aber immer aus schön ar küste entlang.. no ufe as cape naturaliste.. natur pur.. meer.. hunderti vo kilometer wiit.. idrücklich.. was üs übrigens di natur hie in australiä, vor auem hier ar westküste klar gmacht het, isch, dass dnatur sone grosse teil, vo üsere wält bedeckt und si so zfride und so i sich abgstimmt isch.. dass üs das eifach überzügt het, dass di wält e bsundere ort isch.. trotz aune sache, wo mir mönschä astellä.. dnatur isch ächt und ehrlich und vor üs da gsi.. drum.. üsi wält isch, hin oder här, e wunderbare platz!..

denn simer ar caves road entlang witer abe gägä margret river gfahre.. ufem wäg simer id cave ngilgi.. e tropfstei höli.. idrücklich, was sich dört unde für schätz verberge.. denn witer ar caves road entlang simer a x räbfälder und wiibure und degustationsmöglichkeite verbicho.. e herrlichi gägäend.. in MR simer de ufene animal farm.. dört heimer fründschaft gschlosse mit ganz viune tierli und de no mitem kängi tina.. si isch e une zuetroulichi jungi känguruh dame, wo üs, nachdäm mir si zmitzt ufem wägli gfüetteret hei, üse ganz bsuech lang begleitet het.. mir hei ihre de immer wider rüebli gä und hei üs fasch nid chönnä erhole vo dere „härzigkeit“.. jüüüü.. am nächste tag simer vo MR bis uf Augusta abe gfahre.. e churze wäg, wo sich mega glohnt het.. dört simer a südwestlichst punkt vo australie cho zum cape leeuwin.. e lüchtturm.. o dört wider unbeschriblech schöni natur.. überau.. ufem ufewäg ar coast entlang simer eifach mau ine wäg links ine boge, obwouh dört kei wägwiser gsi isch.. witer entlang biege mer rächts ab, o wider kei wägwiser, mir parkiere dört und loufe eifach mau gägäs meer.. de simer ane strand cho.. öppe zwöi kilometer.. womer abe chöme, isch dört e family gsi und mir si de rächts am strand entlang füre gloffe.. de simer öimem häräglägä und hei dä risig strand für üs alei sehr sehr gnossä..:)..

de am nächste tag simer wider zrugg uf mandurah gfahre und si sit gester auso wider hie.. mir hei üs chli i dä ort hie verliebt.. leaning back and simply enjoy isch hie agseit..

ja, morn geits zrügg uf perth.. dört heimer es cool hotel amne guete standort gfunde.. mir hei vor ei tag perth zmache und ei tag freemantle (d hafestadt vo perth) und de am fritig morge früeh flüge mir ab.. ab uf BALI.. mir fröiä üs sehr! es isch würkli wunderbar gsi hie und mir si dankbar für aues, wo mir hei dörfä erläbä da.. mhm..:)

auso, mau luege, wemer in bali mau e möglichkeit gfindä, um öich o vo dört no e bricht zschribe.. de mache mir das.. ansonsten gseh mir üs gli wider ide schwiz.. üsem heimatland.. womer trotz au dere herrlichkeit hie immer no sehr liebe und mir fröiä üs ou uf üses schönä dahei und de timi..

vo härzä.. vilich zum letschte mau, vilich zvorletschte mau.. vo üsere reis.. steve und daniela.. on the road:)

AJA und no öppis.. während üsem ufenthalt hie ar westküste isch dahei öppis passiert, wo üs sehr sehr troffe het.. aui die mönsche wo involviert si gsi, wüsse, vo was mir jetz rede.. mir bedanke üs eifach nomau u nomau u nomau für aui öii hiuf, für au öii chraft und au öii unterstützig.. am timi geits wider sehr guet und mir fröiä üs eifach mega, ihn wider dörft zknutsche und dass er o üs wider het wöuä gseh und drum kämpft het! DANKE würkli vo töifem härzä!!!

it's raining man.. halleluja

Sat, 03 Apr 2010 02:39:59 +0200

..so hüt isch scho de letscht tag hie in cairns..

am erschte tag am abe simer de no düre night market gloffe und hei schlussendlich zwöi riise sushi mit ufs zimmer gno und die de verknabberet..
geschter simer nach zmörgele im zimmer eifach mau losgloffe.. de heimer zgreat barrier reef buechet – scho bim bueche heimer beidi irgendwie sones gfühl gha, wi sich hüt de usegstellt het, aber dadezue später – de heimer öppis zmittag gässä.. und hei wöuä go wakeboarde a sone cableski.. adr bushaltestell heimer de müesse feststelle: es fahre hüt keni busse (karfritig), auso isch das nüt gsi.. de heimer üsi zit süsch eifach no gnosse.. umdi füfi bimne schwümmli i de lagoon heimer de di zwöi franzose wider troffe (für si womer züberbrückigskabel si go organisiere).. nachere stund schnürele im wasser heimer spontan entschide, dass mer zämä gö go znacht ässä.. mir si is salt house gangä.. dört heimer de e uu glatte abe verbracht..

hüt am haubi7i heimer üs ready gmacht für ufs schiff, dört ufs check-in wartend erfahre mir, dass zschiff e defekt het und mir si zumne andere schiff spediert worde. das widerum isch langsamer und chliner, aber d mängi vode lüt isch di glich blibe. mir heis üs de churzerhand umentschide und si an land blibe. drzue isch d sicht duesse eifach immer no nid würkli sehr guet und es het grägnet, was het abemöge.. de simer is hotelzimmer go zmörgele und hei es black jack gspilt:).. so und da simer jetz.. wider e gmüetliche tag.. mir gniesses, chli rueh zha, nachemne monat fasch non stop öppis los.. bis gli wider dir liebe!

vo herze
mir zwöi.. on the road:)

Halbziit...

Fri, 02 Apr 2010 06:14:36 +0200

Vor über 10 täg hämmer sletscht mol es brichtli gschrebe!!

Jetzt simmer in cairns uns sit geschter rägnets nonstop!!!!!! Aber eus wird’s nie langwiilig. Git immer öppis zmache und denn zum schluss au no es brichtli *smile*.

Mir hend zwoi super schöni täg uf fraser island verwütscht! De warren, euse buschauffeur uf de insle, het üs zimlich schnäll, aber sicher, ume chauffiert. Es isch eifach traumhaft gsi. Mir sind im eli creek go umenandlaufe (und bädele), im lake wobbie go schwümme, uf de IndianHeads dUussicht gnosse (punkt ganz im norde vo de insle) und hend en coole rägewald spaziergang gmacht. De sonneufgang so um die viertel vor 6i hemmer au gseh. Während em sonneufgang hend sich sogar 3 dingos am strand bizzli gstritte, do simmer denn halt eifach bizzli uf ziite . Wo mir ufem wäg gsi sind zum lake mckenzie isch vor eus en bus gstande metere panne! Jo bravo, und das bimene wägli wo ned vell breiter als de bus sälber isch. Er het leider kei benzin meh gha. Sie hend denn vo eusem bus benzin usepumpet und bim andere dri glärt. Leider het er denn immernonig chöne de motor aaloh. De warren het versucht rückwärts sWägli zrugg zfahre, aber do simmer au ned wiiter cho. Bravo!!! Nei, sHighlight isch ufem spiel gstande. Aber wo mir denn wieder zrugg gfahre sind, het er de bus doch no chöne aaloh. Juupiee. Somit hemmer de lake mckenzie chöne gnüsse. En traumhafte süesswasser see met wiisem strand. Siehe föteli.

Nach hervey bay simmer denn nachemene zwöschestop in rockhampton sicher in airlie beach aacho. Es sind zwoi langi fahrte gsi und sind froh gsi, wo mir ändlich aacho sind. Mir hend denn üs grad entschied, dass mir am nöchschte tag ufes sägelböötli gönd. Mir hend es cools gfunde und hend das au grad bimene touriste infocenter buechet. Am morge frühe isches denn los gange. Am 7.10 sind die eus cho abhole und am 8ti simmer ufem böötli gsi und ufem wäg richtig whitsunday inslene. Ufem boot isch alles inklusiv gsi: kaffi, tee, guezli, frücht, softdrink, bier, wii, bbq am mittag usw…. nachem erschte schnorchelgang, simmer denn wiiter uf de ganz berüemti strand: whiteheaven beach. Appropo schnorchle, mer het ned wenig gseh, sonder fascht nüt. Wäg dem wirbelsturm ului wo jo dure isch, isch das wasser immerno uufgwühelt gsi. Wenn mir jedoch 2m abetaucht isch, het mir es paar koralle voneere entfernig vo 50cm chöne gseh. Mir hend sogar jewiils 1 fisch gseh!! Judihuiii. Nach dem schnorchle ischs mir leider nümme wohl gsi. Mir wird’s jo ab so sache schlächt. Kotz kotz. Nachemene ziitli ischs mir de wieder guet gange und daniela het dSonne ganz vore ufem böötli gnosse. Nachem abstächer a dem strand ischs mir scho einiges besser gange und ha denn au sfeine bbq chöne ässe, und au bhalte. Isch also wieder einisch en wunderschöne tag gsi.

Am nächschte tag simmer wieder einiges gfahre. Churz vorem campground het de steve dänkt, er got no ane tankstell go tanke. Da isch e ganz e schlächti idee gsi, well schlussendlich simmer ca. 2 stund a dere tankstell gstande und sind scho rächt kaputt gsi vom fahre. GRUND: de leiser het nüt überleit und anstatt diesel, normals benzin tanket!!!!! Wääääähhhh… f***!!!! Do hets nomme eis gäh, das benzin mue irgendwie use, uf kei fall umenandfahre. Und das amene sonntig. De lieb gott het eus zum guete glück en ängel gschickt wo eus gholfe het. Er het zerscht probiert metemene schluch alles usezpumpe, aber da isch ned ganz gange. Benzin metemene schluch usem tank zbringe isch ned eso fein. Denn isch er unters auto kroche und het de filter wegnoh und ich ha dörfe zündig öppe 300x dörfe iischalte und uuuschalte und iischalte und uuuschalte, demet alles benzin usechunt. Glück im unglück, es isch alles glatt gange. Isch also eusi türschti tankfüllig im läbe gsi. Nach feine pasta und salat hemmer denn wunderbar chöne pfuuse.

Am 29te simmer denn vo rockhamptom richtig cardell gfahre. In cardell ha ich no e feini beef-pie gässe. Das sig so e spezialität vo det. Het eus sogar de polizist gseit, wo eus 30min vorher aaghalte het und ich no i sis alkoholtestgrätli ha müesse blose. *grins*. De strand isch ned würkli cool gsi det, darum simmer grad wiiter richtig mission beach. In mission beach aacho – uusgstorbe. Es het fascht kei lüt gha. Luut infos vo det, isch momentan eifach kei saison. De Strand isch au do wägem sturm nümme würkli schön gsi. Tja, isch ned eso schlimm, hemmer gseit, denn chömmer jo no in paronella park. Wenn sich öpper interessiert, eifach mol google, da isch ganz en interessanti gschicht.

Am nächschte tag simmer denn de super cooli park go aaluege. Wo mir denn am nami alles gseh händ, hemmer churzfrischtig e planänderig gmacht, so wie no öfters bis jetzt. Mir sind ned det bliibe, sondern gard wiiter zu eusem letschte ziel: cairns. Ufem wäg hemmer no es päärli troffe, wo e panne met ihrem auto gha händ. Ihri batterie isch dunde gsi. Leider het die tankstell und au 30 anderi lüt wo sie scho gfroget hend, keis überbrückigs kabel gha. Mir leider au ned. Mir sind es paar kilometer gfahre und hend denn schlussändlich öpper gfonde met somene „jumperli“. Wo mir natürli anefahred, isch scho öpper det gstande. Doppelt einfädelt .

Mir sind wie gseit vor 2 täg guet in cairnes aacho. Geschter hemmer alli wösch no chöne mache. Das mue leider au i de ferie si.

Höt hemmer de camper ohni problem abgäh und sind bizzli dur cairnes gloffe und au scho be de lagoone gsi, wo sie do händ. Ähnlich wie in brisbane. Sit geschter rägnets numme no. Die ganzi nacht hets *****. Höt leider au fascht de ganz tag. Leider gsehnd die nöchschte täg au ned guet uus. Vellecht hemmer jo glück und es wird besser. Mir möchte gern no e schnorchel/tauch tour zum great barrier reef mache. Am 4te flügemer denn ab zum ayers rock.

So, da isch alles wo ich grad weiss. Es goht eus immerno super guet und gnüsset jedi minute/stund/tag.

Daniela & Steve.. on the road:)

Autofahren, Autofahren, Autofahren

Fri, 26 Mar 2010 10:44:36 +0200

Nach zwei Täg Autofahre: Hervey Bay - Rockhampton - Airlie Beach, gömmer morn ufen Sägelturn uf dWithsunday Insle. Got morn am morge frühe los.

Also, mir mache schluss und mälde üs wieder, wenn mir zrugg sind.

Lg
Daniela & Steve

Hervey Bay

Mon, 22 Mar 2010 00:25:30 +0200

halli hallo dir liebe.. mir si gester in Hervey Bay acho.. Hervey Bay isch ufem festland vis-à-vis vo Fraser Island, ar gröschte sandinsle vo de welt..

guet zrügg dört härä, wo mir üs zum letschte mau usfüehrlich gmäudet hei.. das isch in Byron Bay gsi, churz vor üsere abfahrt am morge.. denn simer witer richtig Surfers Paradise.. wo mir dört düre gfahre si, heimer gfunde, ja, ööh.. macht üs nideso a, fahre mir chli witer.. de simer bis biggera waters gangä, chli oberhalb surfers paradise.. det simer de ä nacht blibe und am nächste tag ou grad wider witer.. richtig Brisbane.. guet auso gägä Brisbane zue hets e nationalpark, wo üs gluschtet het.. dr daisy hill conservation park (dört hets rund 50 koalas).. dört simer de ou härägfahre und si ä track abglüffe, im rägäwald.. am afang simer beidi sehr ruhig gsi, irgendwie weisch nid so genau, öb dir jedä moment ä schlange vord füess gheit, es komisch grunzends känguruh übere wäg louft, oder was ou immer.. mit dr zit simer de chli uftout.. hei gschnürelet und ganze gueti wanderig gha, mit vilnä begägnigä mit schmätterlingä, chlinä eidechsli und am schluss no spinne i spinnelenetz.. si si doch e chli gros gsi und hei üs churz la erschudere, aber si heil devo cho .. de simer no is koala center, o grad dört.. dört tüe si imne projekt dr natürlich läbensrum vo de koalas so guet wi möglich erhalte und zum teil widerkonstruiere.. im center simer de amne uu süesse halbschlafende koala begägnet.. di si eifach zum knutsche di tierli … jüüüü

übrigens, dr Sven und dAndrea hei ihres zwöite Kindli becho, er heisst Cédric und mir fröiä üs u hennä fescht für si und de Gian! Mir schicke öich ganz liebi Gedanke und wünsche öich wunderschöni erschti tage mitem Cédric!

..de simer in Aspley acho, ir nöchi vo Brisbane. Am nächste tag simer go Brisbane aluege, isch e schöni stadt, gfallt üs.. si ono ire gallerie vo aborigines bilder gsi, faszinierend.. liebs grüessli a di doris ..

nach Brisbane simer witer nach Noosa.. es herzigs örtli.. dört simer de am zwöite tag i noosa national park und si de coast track entlang gloffä.. isch u schön gsi.. soviu nature, meer, wällä.. pflanze, tierli, schmätterlingä, eidechsli und und.. aja und ufem track heimer no e wilde koala gseh.. es paar anderi lüt heine entdeckt und mir si grad härä gloffä.. isch u faszinierend und es grosses glück, eine die wildnis zgseh.. die frou im center im conservation park het üs gseit, dass si sich meistens so guet verstecke, dass me se sältä eifach eso de wildnis gseht, es sigi grosse zuefall, we würkli mal öpper eine gsäch.. mir hei also unes grosses glück – danke! nach zwöi nächt in Noosa, simer gester in Hervey Bay acho.. jetz blibe mer mau chli hie und mache vorussichtlich am zischti und mittwuch e tour uf fraser island.. mir fröiä üs uf di wunderschöni insle, vor allem ufe lake mckenzie, das isch e stahlblau klare süesswassersee uf dr insle..

bis gli wider.. mir hei öich gärn!

daniela und steve.. on the road:)

Brisbane and Noosa !!

Fri, 19 Mar 2010 12:00:00 +0200

Mir sind geschter und höt in Noosa gsi. Morn gohts denn wiiter richtig Hervey Bay und denn richtig Fraser Island. En längere Bricht gits denn i de nöchschte Täg, wenn mir wieder emol en wösch und internet Tag mache . Sind am Zieschtig in Brisbane aacho und am Mittwoch hemmer es paar schöni Iidrück chöne gnüsse i der Stadt. Wie gseit, alles wiitere denn spöter.

Grüessli vo Noosa
Daniela & Steve.. on the road:)

byron bay.. bye bye

Sun, 14 Mar 2010 20:56:50 +0200

..drizähtedrittezwöitusiguzäh, einäzwänzginullnull.. mir si jetz in byron bay.. sit gester abä.. auso.. gester morge simer in coffs harbour los.. denn heimer gseit, chumm mir gö no hurti go ichoufä.. si de ines shopping center und süsch no so chli umegflaniert und hei zwöi drü sache poschtet.. denn öppe am drü simer de abgfahre.. igchouft heimer natürlich ou no.. hihi;) guet..
de öppe am haubi7i simer hie acho.. alles voll lüt.. fritig.. Lüt vo Brisbane und Sydney si hie am weekend gniesse.. folglich hei mir wandervögu – natürlich eifach mau härägfahrä und dänkt, das het de scho platz, wi immer bisher – uf zwöi plätz kei platz meh gha.. camparvans: NO. Guet de simer chli usserhalb ufene platz, wo i üsem broschürli kei bewertig gha het.. mir si eifach mau gangä, hei e platz gno ohni strom und es isch ganz romantisch gsi:)..
Ir nacht heimer so chli jumanji gha.. eis gmög und lärm vo au dene tier.. am morge hani de entdeckt, dass mer amne fluss stationiert si.. dr morge isch drfür herrlich gsi.. bi früeh use (mis schätzeli het no pfüselet:)).. so am fluss, sunneufgang, ganz viel tierli vo umeflüge, watschle, schwümme… denn nachem zmorge simer witer ufene campground in byron bay sälber, grad am strand und am afang vom städtli.. isch sehr schön und gäbig.. ja de hüt simer mau am morge und nami am strand gsi.. het guet ta.. im wasser heimer mitdä welle gspilt.. vor allem de steve, er isch süchtig worde, hihi:).. am abä heimer düschelet und si is städli chli go umegniesse.. denn statt go znachtässä, heimer üs e wii gholt, zwöi pizzas und aja es hösli heimer ono gchouft gha vorher ufem hippie-märit – auso so heisst er gloub nid, aber isch definitiv die stimmig dört gsi, e chline uuu herzige markt und dört hani es handmade hösli gchouft bire uu coole frou, het üs gfauä;) – ja, auso statt znachtesse im resti hets de pizza, wi und es stadt land fluss im campi gä, hihihi… üs geits herrlich guet.. mir wünsche öich e super zit.. bis gli gli gli wider…

..scho wider zwöi nächt vergangä.. gester simer uf cape byron, das isch sone halbinsle, ufe. dört hets e Lüchtturm und mir si insgesamt, mit paarne zwüschhäut, um di halbinsle gloffe, bis mir wider bim camper und lüchtturm obe si gsi.. isch e schöni tour gsi und het guet ta. de simer retour zum camping platz, de is städli, chli go shöppele.. gägä abe simer a strand go zapéro näh.. isch ja super gsi:).. und gli hets znacht gä.. jetz isch morge am zähvor8i.. gli zieh mer witer richtig norde.. mir gö go z crystal castel aaluege und de mau uf surfers paradise go ineluege.. mau luege, wo’s üs no so häräschneit:).. mir wünschä öich jetz ganzä schönä Mänti une guete start idi nöii wuche.

müntschi
mir zwöi.. on the road:)

Sydney - Nelson Bay - Port Macquarie - Coffs Harbour

Thu, 11 Mar 2010 11:25:59 +0200

Es isch jetzt churz nach 22.00 und ligge scho im Bett. Mir hend bis jetzt leider nonig so vell Möglichkeite gha während de fahrt vo Sydney bis do ane (Coffs Harbour), öppis do inne zschriibe. Sorry Sämi und Manu. Mol luege, vellecht hemmer jo im Norde obe ab und zue meh WLAN ufem Campground.
Die Ziit in Sydney isch mega schnäll verbii gange und eigentli chöntmer det sehr vell meh Ziit verbringe. Somit chömer jo wieder cho

Die erschti Reis het üs genau durch dCity vo Sydney brocht und über dHarbour Bridge! Nach ca. 2 Stund fahrt hemmers doch no gschafft. Sind be eusem erschte Campground aacho und sind au grad 3 Nächt bliibe. Als erschter zNachtässe hets Spaghetti met Tomatesauce gäh und Salat dezue. Jam jam.
Mir hend die Ziit richtig chöne gnüsse. Mir sind um dMittagsziit richtig Nelson Bay gfahre und hend e Dolphin Tour ufemene Schiff buechet. Nachdem Daniela serscht mol im Subway gsi isch, simmer denn grad ufs Böötli. Mir hend es paar Dolphins gseh. Nachemene Ziitli sind die sogar ganz nöch as Böötli cho und unde dure gschwumme. Isch mega cool gsi. Nach dem Abentüür simmer denn uf the Berg wo grad i de nöchi gsi isch. Ca. 20min spöter simmer denn zoberscht gsi und hend die Rundumsicht chöne gnüsse. Ufem Rückwäg hemmer sogar no es Känguruh gseh und e grossi Eidechse. Zum zNacht hets folgendes ghä: Pouletbrüschtli, Zucchetti und gfüllti Champignons vom Grill. Dezue no en grüene Salat met Rübeli drin und en Tomate-Mozz Salat, obwohl de Mozz vo do ned würkli nach Mozz schmöcht so wie euse diheime. Denn hemmer no eusi Route für morn besproche. Next Stop: Port Marquirie.
Hend en grosse schöne Campingplatz gfunde. Sind denn no an Strand füre und i das iischalte Wasser go bade. Brrrr, aber isch lässig gsi met dene grosse Wälle. Het einigi Surfer gha.
Ufem Wäge richtig Coffs Harbour simmer no bim Billabong Quala Park verbii. dFöteli sind au scho online . Nach knapp 200km fahre simmer denn do in Coffs Harbour aacho. Geschter ischs no einigermasse schön gsi, aber höt hets leider numme 1x grägnet. Au ned so schlimm, denn hemmer üs halt de Wösch gwidmet. Mue jo au si. So, langsam isches würkli Ziit. Morn gots ab richtig Byron Bay.

Sobald mir wieder online chönd si, mäldemer eus wieder.

Daniela & Steve.. on the road:)

Sydney by night..

Thu, 04 Mar 2010 14:40:00 +0200

guguus.. mir maeudae ues wider emau:)..
si huet morge am sibni in sydney glandet, denn is hotel chauffiert worde.. guet, nach uebere stund warte am flughafe und nid genau wuesse, was jetzt louft - und das nach 7 stund flug ueber nacht mit ziemli weni schlaf und amne ereigrisriche hervorgehende tag.. jaenu.. so heimer ues grad adi hiesigi mentalitaet "take it easy" choenne gwoene! STOP

nachere stund warte ir lobby, 11i, nachemne duescheli im zimmer - isch es schoens:) - und ungefaehr sibe stund schlaf - wow si mir mued gsi - simer wider under di Lebendige cho!
aalege, los id Stadt vo Sydney richtig Hafe.. denn heimer ae Spaziergang am Hafe entlang gmacht und si ufene feine Italiener gstosse. Bimne feine Glas Rotwi heimer dStimmig gnosse und hei festgstellt
"MIR SI AACHOOOOO:):)".
Guet, denn e Bananesplit zum Dessert und es paar churzi Smalltalks mit de Kellner/inne heimer de zahlt.. witer am Hafe entlang, heimer de mau richtig hei woeuae loufe.. ja, oehm.. isch anders usecho.. mir hei e cooli offeni bar mit luter musig u tanzende entdeckt und gfunge "chum mir goe eis go naeh".. es baccardi breezer und maenge, maenge tanzschritt spaeter heimer ues de gmuetlich ufe heiwaeg gmacht.

jetz sitze mer ir lobby vom hotel, es isch 01:33 und mir goe gli go schlafe.

bi oeich isch jetz haubi vieri (ha mis natel uf CH-zit gla, damit mer geng grad wuesse, was dir fuer zit heit:)).. mir danke fescht a oeich und wuensche oeich scho gli e schoene fyrabe..

bis gli wider..
daniela und steve.. on the road:)

welcome to the city of colours:).. mir si da

Mon, 01 Mar 2010 15:00:00 +0200

bi üsem flug isch alles tiptop gange.. hei sogar chli chönne pfüsele:)
hüt morge am füfab5i simer hie in Singapore glandet.. denn simer abgholt und is hotel chauffiert worde. gut:).. denn heimer natürlich nid am morge am haubi6i i üses Zimmer chönne, si de ine hospitality lodge go warte - zimmer 817, hei dört drü melbourner (eine devo e gebürdige neuseeländer) und ei inderin kenneglernt und rege gspröchlet.
9.OO lige mer ide jeans am pool, uu müed, fasch bzw. zum teil ganz am pfüsele.. 10.00 Zimmerbezug (Nr. 3252 im 32schte stock) - dusche - schlafä - eigentlich bis am eis, isch aber du de halbi6i worde, hihihi.. uf, alegä und ab richtig city.. idr u-bahn.. si mittlerwile dört unde scho fasch dahei:).. orchard-road uf und ab und hei im nike-store scho zuegschlagä.. fein gässä und jetz sitze mer ir hotel lobby vom swissôtel und gö gli go pfüsele..
morn morge geits witer mitere city-tour am 9i starte mir..

mir grüesse öich vo ganzem ganzem herze und schicke öich liebi Gedanke!

vo herze und ganz farbig
steve und daniela.. on the road:)